వంగిపోతున్న దేశానికి నింగి ఎత్తు వెన్నెముక

కలల రక్తానాళాల్లో రక్తం కాదు
భావితరాల కోసం బలైన ప్రాణాలు
ప్రవహిస్తున్నాయి!
వంగిపోతున్న దేశానికి నింగి ఎత్తు
వెన్నెముక
నిర్మించే పండగలో పాల్గొంటున్నాయి
జాతి బాహువులకు కండరాలై
ఛాతీకిరువైపులా
నిలవడానికి పరుగులెత్తుతున్నాయి...

-- శేషేంద్ర, వచ్చింది ఓట్ల ఋతువు 

ఇది దేశమా లేక కంఠపాశమా
అరే
ఈ మట్టికోసం బలి అయిపోయిన
ఆత్మల సమాధుల మీద
గడ్డి కూడా మొలవదు ఇక్కడ
రాజకీయ నాయకుడు ఇరుసుగా
తిరుగుతోంది పత్రికల భూగోళం
భూగోళం మీద కడుపుతో
పాకుతోంది చీమల్లాంటి కవీంద్రజాలం
కనుకనే నీవు కవుల్ని చూస్తున్నావు శేషేన్!
గడ్డి పరకల్ని చూచినట్లు తుఫాన్.

-- శేషేంద్ర

శేషేంద్రజాలం

నీవు కాలేజికి పోతుంటే బాబూ
నిన్ను పొలాలు బిక్కమొహంతో చూస్తున్నాయి
నీవు కాలేజి గోడల్లోకి పోతావు
అక్కడ్నించి గవర్నమెంటు గోడల్లోకి పోతావు
ఆ తర్వాత ఎప్పుడూ ఎవ్వరూ
తిరిగిరాని గోడల్లోకి పోతావు
ఇక నీవు బ్రతికిందెప్పుడు?
బాబూ! నీ చిన్ని కన్నీటి బిందువులో
ఏ సముద్రం గర్జిస్తోందో నాకు తెలుసు
అందుకే చెట్లతో మొరపెట్టుకుంటున్నాను
ఆకులు కాదు తుపాకులు కాయండని-

ఇది రాసి ఎన్నేళ్ళయిందోగాని ఇప్పటికీ పరిస్థితుల్లో మార్పేమీ లేదు. అప్పుడు గవర్నమెంటు గోడల్లోకి, ఇప్పుడు అమెరిక కలల్లోకి...

*********

బేటావాడ్ని మాత్రం నమ్మకు
వాడు జెండాలెగరేసే దొంగ
నీళ్ళున్నచోటికి ఎగిరిపోయే కొంగ
ఉదయకిరణాలు పోలీసుల్లా
వెదుకుతున్నాయి ఏదో తీవ్రంగా
పాపం వాటికి తెలీదు
రక్తకణాల్లో దాక్కొ ఉన్న దొంగల్ని
రాష్ట్రపతి కూడా పట్టుకోలేడు.

**********

ఒరే! ఈ దేశం మీకేమిచ్చింది?

వంకరటింకర్లుగా ఒంగే దేహం

బానిసత్వం మీద వ్యామోహం

మీరెగరేశే జెండా మీకేమిచ్చింది?

ఐదేళ్లకొకసారి ఓట్లు

ఆ మధ్యలో కునికిపాట్లు!

*********